Thethi, një prej zonave më të bukura në Shkodër, që po tërheq gjithnjë e më shumë vëmendjen e turistave vendas, por edhe të huajve. I vendosur mes majave të thepisura e i veshur nga një natyrë, e cila ka rezervuar bukuritë më të mëdha.

Një orë në këmbë nga Thethi, në një rrugë që kalon përmes lumit dhe maleve madhështore mund të shkoni në ujëvarën e Grunasit, e cila përfaqëson një ujëvarë me lartësi rreth 30 metra. Ajo ka pamje mjaft tërheqëse, sidomos në kohë me diell, kur piklat e ujit zbërthejnë rrezet diellore, duke formuar ylberin shumëngjyrësh.

Pranë ujëvarës ndodhet Kanioni i thepisur i Grunasit, që falë ngushtësisë dhe ujit të kristaltë që kalon mes tij krijon një atmosferë tejet intime.

Sapo kaloni Kanionin, do ju duhet të ecni rreth 30-40 minuta për të duke shkuar në fshatin Ndërlys, aty ku gjenden Vaskat e Gurit, disa formacione spektakolare shkëmbore të krijuara nga prurjet e Lumit të Zi.

Lumi i Zi duke zbritur nga fshati Kaprre, krijon një tjetër destinacion që të lë pa fjalë: Syrin e Kaltër. Kjo pishinë e madhe e kaltër është e zhytur në gjelbërim, dhe nga shpatet e maleve gjendet një grykëderdhje elegante që krijon vërtet një ambjent përrallor.

Falë vendpushimeve, turistët mund të pushojnë e të shijojnë ushqimet karakteristike të zones. Bujtinat apo Hotelet prej guri ofrojnë të gjithë ngrohtësinë dhe mikëpritjen e njohur malësore, që e bën largimin nga ky vend gati të pamundur.

Të tjera destinacione tek të cilat mund të ndaleni janë Kisha e Thethit, Kulla e Ngujimit, Shpella e Thethit, Ujëvara e Gjeçajt, Liqeni i Qafës së Pejës apo të eksploroni më tutje majat e shumta që lartohen ngado.