Kryeministri Edi Rama paralajmëron se pas ndryshimit në kabinetin e tij qeveritar, në janar do të ketë ndryshime edhe në nivele të larta të administratës. Mësohet se drejtorët e përgjithshëm, rajonal apo lokal, që kanë drejtuar më shumë se 5 vjet, do t’u lënë vendin drejtorëve të rinj. Kreu i qeverisë ka theksuar se:
“Përtëritja e qeverisë do të pasqyrohet edhe në nivele të larta të administratës, ku përfshihen drejtorë të mëdhenj dhe drejtues rajonalë në qarqe”, mësohet të jetë shprehur Rama në mbledhjen e fundit kryesisë së PS-së.
Në mbledhjen e kryesisë së PS-së, Rama vendosi të ndryshojë më shumë se gjysmën e kabinetit të tij. Nga 14 anëtarë të kabinetit të tij, kreu i qeverisë vendosi të ndryshojë 8 prej tyre. Përmes kriterit “5 vjet ministër”, Rama vendosi të largojë ministrat Arben Ahmetaj, Damian Gjiknuri, Ditmir Bushati, Lindita Nikolla, Mirela Kumbaro dhe Niko Peleshi. Pavarësisht se nuk kishin 5 vite në qeveri, nga qeveria u larguan edhe zv/kryeministrja Senida Mesi dhe ministrja për Sipërmarrjen, Sonila Qato.