Debati për reformën zgjedhore është rihapur për shkak të takimeve që Komisioni i Venecias dhe ODIHR kanë zhvilluar përgjatë dy ditëve me aktorët kryesore politike në vend. Shqetësimi kryesor që opozita i ka përcjellë ekspertëve të Venecias në lidhje me ndryshimet e 5 tetorit është formula e koalicioneve, e cila sipas ekspertit të zgjedhjeve në PD, Oerd Bylykbashi, u ndryshua në mënyrë të njëanshme për të favorizuar mazhorancën.
Partia Demokratike dhe Lëvizja Socialiste për Integrim, Komisionit të Venecias, si shqetësim kryesor i kanë përcjell rrëzimin nga ana e PS-së të marrëveshjes së 5 qershorit dhe ndryshimin e formulës së koalicioneve.
Në takimin online që Komisioni i Venecias dhe ODIHR kanë zhvilluar përgjate dy ditëve me aktorët kryesorë politik në vend, opozita jashtë parlamentare ka theksuar se mazhoranca po kërkon me instrumenta të jashtëligjshëm të ndikojë në rezultat.
“Përpjekja e PS për të ndryshuar mekanizmin e mbledhjes së votave nëpërmjet partive apo koalicioneve dhe këto vota ti kthehen në mandate me qëllimin e vetëm që të ndikojë në rezultatin e zgjedhjeve parlamentare në mënyrë të njëanshme.”
Debati për reformën zgjedhore ishte shuar, por ish -deputeti demokrat, Oerd Bylykbashi, këmbëngul se sido që të jetë opinion final i Venecias, rekomandimet e tij duhen reflektuar në ligjin zgjedhor.
Koha sipas tij është e mjaftueshme.
“Rekomandimet e Komisioni te Venecias dhe të ODIHR se do të jetë një opinion i përbashkët janë 100% të zbatueshme brenda afatit të kodit zgjedhor për regjistrimin e subjekteve.
Por reforma zgjedhore që në nisje të saj u konceptua më e gjerë se ndryshimi i kodit elektoral dhe marrëveshja e 5 qershorit përfshin ndryshimin e 7 ligjeve që në këndvështrimin e opozitës garantojnë mekanizmat kundër korrupsionit zgjedhor.
Sot ligji i parë u rrëzua nga ana e mazhorancës, ndërsa disa të tjerë ende nuk janë diskutuar.
“Nëse parlamenti do të bllokojë këto ndryshime do të kemi së pari shkeljen e marrëveshjes se 5 qershorit, do të kemi zhbërjen e konsensusit për instrumenta të tjera që godasin krimin zgjedhor dhe se treti tregon qartazi që mazhoranca kërkon përsëri që atë që do të bëjë në datë 25 prill duke angazhuar serish kriminelët të mos jetë e ndëshkueshme nga prokuroria, duke i lidhur duart prokurorisë.”
Gjatë sesionit online me ODIHR dhe Komisionin e Venecias, krahas ekspertëve dhe ish-deputetëve të PD-së dhe LSI-së, mori pjesë edhe vetë kryetari i opozitës Lulzim Basha.