PD denoncoi atë që quan uzurpim të Bashkisë së Tiranës. Ilir Alimehmeti që drejton këshilltarët bashkiakë të PD, mori si shembull rastin e ish-uzinës së autotraktorëve, pronë në varësi të Bashkisë prej vitit 2017 për të realizuar veprimtari social-kulturore e sportive, e cila sipas tij po rrëmbehet nga Qeveria për të ngritur një fabrikë armësh e municionesh.
”Çfarë bëri Bashkia Tiranë këto 8 vite? Asgjë? Tani, me një akt të dënueshëm rrëmbimi të kompetencave vendore, qeveria vendos marrjen e pronës së Bashkisë Tiranë dhe kalimin e saj në funksion të Ministrisë së Mbrojtjes me qëllim ndërtimin e fabrikave të prodhimit të armëve dhe municioneve”, tha këshilltari i PD në bashkinë e Tiranës, Ilir Alimehmeti.
Po ashtu Alimehmeti theksoi se i vetmi organ që mund të trajtojë objektet në pronësi të Bashkisë Tiranë është Këshilli Bashkiak. ”Për qëllime ushtarake, ka mjaftueshëm objekte dhe terrene që mund të përdoren e që ndodhen në zona më të përshtatshme po brenda territorit të Bashkisë Tiranë. Por pranë njerëzve dhe në zonat e banuara është e nevojshme të ndërtojmë çerdhe, kopshte, shkolla, objekte sociale dhe fusha sportive në mbështetje të tyre dhe familjeve të tyre”, deklaroi Alimehmeti.