Deputeti i PS, Arben Pëllumbi është shprehur se opozita përballë pozitës ka qenë e dhunshme duke thënë se për këtë arsye qeveria nuk ka nxjerrë produktin që ka pasur për qëllim. I ftuar në emisionin “Drejt”, Pëllumbi tha se PS ka bërë një opozitarizëm konstruktiv ndryshe nga opozitarizmi i PD që sipas tij ka qenë i dhunshëm.
Arben Pëllumbi: Kur je në pushtet ke nevojë për opozitën, ky sistem nuk funksionon pa të dy krahët. Në rast se ke një opozitë të dhunshme, pra nuk e ke qetësinë për t’u marrë me atë që është detyra jote e përditshme për të diskutuar detajet në funksion të shoqërisë, sigurisht dhe produkti që nxjerrë nuk ka për të qenë asnjëherë ai që ti dëshiron të nxjerrësh. Në rast se në Komisionet Parlamentare opozita vjen e bën zhurmë, shkatërron, thyen karriget ti si mazhorancë do kesh nevojën për ta mbyllësh seancës. Opozitarizmi që ka bërë PS në atë periudhë konsiderohet një opozitarizëm konstruktiv, me idenë që ta lërë PD të konsumojë pushtet. Ndërkohë po të shikojmë opozitarizmin e PD kur PS erdhi në pushtet, ka qenë i dhunshëm.
Pëllumbi tha se mandati i dytë i PS nuk ka qenë një mandat normal, pasi pati përballë një opozitë të dhunshme, më pas u përballë me tërmetin dhe pandeminë. Sipas Pëllumbit këto kanë qenë dhe arsyet se përse disa premtime që nuk janë mbajtur.
Arben Pëllumbi: Mandati i dytë i PS nuk ka qenë një mandat normal, filloi me një opozitë të dhunshme dhe u pasua me tërmet me pandeminë. Disa nga premtimet që do jenë berë në mandatin e dytë, për hir të këtyre faktorëve edhe mund të mos jenë mbajtur dot.