Policia e Malit të Zi zbuloi dhe sekuestroi të paktën 170 kg lëndë narkotike të dyshuar cannabis sative. Burimet sqarojnë se në grykëderdhjen e lumit Buna, policia e Ulqinit gjeti të hënën pasdite shtatë çanta të mëdha pasagjerësh që ishin të mbushura me 170 kilogramë marijuanë.
Siç njoftoi Drejtoria e Policisë, në çanta kishte 143 pako drogë. Zyrtarët e Policisë që mbërritën në vendin e ngjarjes zhvilluan një hetim së bashku me zyrtarët e sigurisë së Ulqinit. Policia po merr të gjitha masat për të gjetur personat që kanë kontrabanduar drogën e gjetur.
Policia malazeze, në mënyrë të vazhdueshme, ka bllokuar sasi të dukshme të drogës të llojit marijuanë, e cila transportohet në format më të ndryshme drejt Malit të Zi. Zonat kufitare mes Malit të Zi dhe Shqipërisë siç janë Lumi Buna, Liqeni i Shkodrës, zona e Malësisë së Madhe dhe ajo e Vermoshit konsiderohen si territoret më të përshtatshme për trafikimin e lëndëve narkotike në drejtim të Malit të Zi dhe Europës.