Policia Rrugore e Tiranës ka shtuar masat pë të ndëshkuar të gjithë shkelësit e rregullave të qarkullimit rrugor. Në një njoftim për shtyp, kjo strukturë e bën të qartë se do të monitorojë lëvizjen e mjeteve në rrugë, për të shmangur aksidentet e mundshme, sepse shkelja e semaforëve mund të sjellë pasoja të rënda. Policia Rrugore publikoi një video, ku shfaqen shoferët, të cilët shkelin rregullat e qarkullimit.
NJOFTIMI
Policia Rrugore e Tiranës vijon të patrullojë dhe monitorojë me mjete të uniformuara dhe civile rrugët kryesore të kryeqytetit me qëllim ndërgjegjësimin, por edhe ndëshkimin e shkeljeve që janë rrezik potencial për aksidente rrugore, siç janë shkeljet e semaforëve, përparësitë ndaj këmbësorëve, përdorimi i celularit gjatë drejtimit të mjetit, drejtimi i mjetit nën efektin e alkoolit etj.
Nga kontrollet policore në disa rrugë kryesore të kryeqytetit, janë konstatuar shkelje “flagrante” të sinjalizimit të ndritshëm (semafor), shkelje të cilat janë burim i shtuar rreziku, veçanërisht për këmbësorët, por edhe për drejtuesit e mjeteve të cilët “nxitojnë” për të kaluar semaforin edhe kur drita e tij është e kuqe, pa menduar pasojat, që mund të sjell nxitimi për të shkelur rregullat e qarkullimit rrugor.