Në analizën e tij për PD, Preç Zogaj thotë se fotografia aktuale e partisë është një fragmentarizim në 3 pjesë: ata që nuk mbështesin askënd, rithemelimi dhe PD zyrtare. Analisti thotë në emisionin “Opinion” se Berisha është një lider i konsumuar në pushtet.
Preç Zogaj: Pikëpamja ime është kjo që një lider politik afatgjatë ka gjithmonë mbështetje në parti. Ai largohet nga politika dhe nga partia për t’i dhënë mundësi formacionit politik për të bërë shumicë në popull. Merrni Merkelin, Merkeli po të kandidonte në partinë e vet, Merkeli del e para. Ka dhënë dorëheqjen për t’i dhënë mundësi partisë pas kaq vitesh në pushtet të gjejë lider, të ecë përpara, të fitojë prapë zgjedhjet. Ky është një argument shumë i gabuar që e kanë kthyer në refren këta pala tjetër që e kanë bërë Berishën… Berisha ëshë një lider i konsumuar në pushtet, nuk është një lider që e pret populli, populli e ka konsumuar, e ka pritur dy herë, duhet të jemi realistë.
Sipas Zogajt, Berisha duhet të tërhiqet dhe t’i japë partisë mundësinë për të zgjedhur një lider të ri.
Preç Zogaj: Berisha duhet të tërhiqet dhe t’i krijojë mundësi gjithë PD, në të gjithë fragmentimin e saj për një proces gjithëpërfshirës që të nxjerrë një lidership të ri dhe pyetja, thatë edhe ju me të drejtë, pyetja cili duhet të na drejtojë në demokraci, është pyetje e gabuar, konsiderohet teorikisht pyetje e gabuar sepse presupozohet se e nxjerr gara prandaj quhet pyetje e gabuar në teori. Ne nëse duam të rrimë në demokraci nuk mund të thyejmë ligjësinë dhe teorinë e demokracisë se këtë ka bërë lidershipi shumëvjeçar i PD qëkur se është themeluar pothuajse. Ka ardhur duke thyer ligjësitë e demokracisë dhe ky është fati i PD.