Prefekti i Qarkut të Dibrës Nexhbedin Shehu gjatë takimeve që ka patur me drejtorët e institucioneve të rretheve Dibër, Mat e Bulqizë krahas problemeve të tjera u ka kërkuar atyre të bëjnë kujdes gjatë fushatës elektorale për zgjedhjet e 25 prillit. Ai ka miratuar urdhërin për monitorimin e sjelljes së nëpunësve civilë.
Grupi i monitorimit ka të drejtë t’u telefonojë dhe t’u kërkojë nëpuënsve të përgjigjen, për të treguar vendndodhjen. “Eprorët duhet të jenë në çdo rast në dijeni të lëvizjes së stafit të tyre, në të kundërt, mos pasja dijeni për mungesa të stafit, do të konsiderohet si mospërmbushje të detyrave funksionale nga ana e tyre”, thuhet në urdhërin nr.5, datë 23 shkurt 2021 të Prefektit të Dibrës Shehu.
Është përgatitur dhe shpërndarë një regjistër ku çdo nëpunës raporton me shkrim hyrje-daljet nga institucioni ku punon, nga ora 08.00-16.30. Kjo listë nga dita e parë e fushatës dhe deri në fund nënshkruhet nga grupi i monitorimit që Prefekti ka ngritur për këtë qëllim.
Prefekti theksoi se as pas orarit zyrtar nëpunësve civilë nuk u lejohet të shprehen publikisht për bindjet e tyre politike dhe nuk u lejojet të mbajnë postera, fletë-palosje apo simbole të subjekteve politike.