Kryetari i Partisë së Lirisë, Ilir Meta është solidarizuar me protestën e thirrur sot në Tiranë, kundër dhunimit të 11-vjeçares nga pesë djem në Prishtinë.
Në një postim në “Facebook”, ndërsa pohon mbështetjen e tij ndaj familjes së të miturës në këtë moment të vështirë, ish-presidenti shprehet se kjo ngjarje është një akt i rëndë që tronditi mbarë shoqërinë shqiptare.
“Mbështes dhe solidarizohem plotësisht me protestën ‘Solidaritet me Prishtinën’ e thirrur sot në Tiranë, në ora 18:30, në sheshin “Nënë Tereza” për mbrojtjen nga dhuna patriarkale të vajzave, grave dhe nënave shqiptare. Duke ju bashkuar kërkesës legjitime për ndëshkimin më shembullor të autorëve që dhunuan vogëlushen 11-vjeçare në Prishtinë, akt i rëndë që tronditi mbarë shoqërinë shqiptare, si dhe duke shprehur të gjithë mbështetjen time për të dhe familjen e saj, solidarizohem sot me thirrjen për të reaguar fuqimisht ndaj një krimi që nuk duhet të gjejë vend në shoqëritë tona”, shkruan Meta.