Policia në Francë arrestoi 97 persona dhe gjobiti 513 protestues që dolën në rrugët e Parisit të shtunën, kundër kufizimeve shëndetësore anticovid.
Sipas mediave vendase është arrestuar edhe një nga drejtuesit më të famshëm të jelekverdhëve, Jerome Rodrigues. Akuza është për pjesëmarrje ose organizim të një proteste të ndaluar.
Mbi 300 automjete janë sekuestruar pasi kanë thyerr rregullin e ndalimit të hyrjes në qytet.
Përveç personave që u ndaluan në Harkun e Triumfit të shtunën, ka pasur edhe ndërhyrje të tjera të policisë natën mes së shtunës dhe të dielës në lagjen Champs Elysées.
Ndërkohë që një episod është duke u komentuar mjaft në rrjetet sociale, ku një agjent i policisë i ka drejtuar armën një shoferi.
Oficeri shihet duke dalë nga makina me armë në dorë, pasi ka ndjekur dhe ndaluar një automjet në të cilin ndodhen disa demonstrues që valëvisin flamurin francez.
Agjenti afrohet dhe i drejton armën shoferit. Shefi i policisë së Parisit kërkoi një hetim të brendshëm administrativ për këtë çështje. Në një video tjetër, një polic godet dhunshëm një burrë në Champs Elysees me shkop në kokë.