Kërkesat për zgjidhje martese në qytetin e Kukësit janë rritur ndjeshëm krahasuar me një vit më parë. Sipas avokates Aurora Guska, shkak kryesor është emigracioni, apo martesa me shtetas të huaj për të fituar dokumente. Ky është një trend i ri i shkaqeve, nëse vërejmë se më herët kanë qenë shkaqet ekonomike apo grindjet familjare.
“Më para ka qenë shkaqet ekonomike, grindjet familjare, tashëm ka dalë emigracioni. Shumë qytetarë nga KUkësi dhe Hasi kanë emigruar për arsye ekonomike, dhe ka bërë që aty të lidhin ndonjë martesë me të huaj, dhe në këto kushte janë detyruar. Ky është shkaku i parë determinant. Kemi divorce që kanë fëmijë. Por është thënë dhe stërthënë shumë herë që divorcet janë bërë problem në qarkun e Kukësit, por në këtë trend rritje nuk ka qenë asnjëherë”, thotë Guska.
Ajo pohon se divorcet në dy muajt e parë të këtij viti janë rritur ndjeshëm, ku sipas të dhënave janë regjistruar 25 kërkesa për zgjidhje martese, një numër i konsiderueshëm për popullsinë e Kukësit.