Kriza energjetikë ka detyruar qeverinë shqiptare që të marrë një sërë masash, me qëllim kursimin e energjisë elektrike. Në aktin normativ të qeverisë, që është publikuar edhe në fletoren zyrtare parashikohen masa për klientë familjare dhe jo familjare, por edhe për institucionet shtetërore.
Kështu, sipas aktit normativ, ambientet e jashtme të institucioneve publike, rrugët ndërqytetëse kryesore dhe dytësore, objektet e kulturës, monumentet dhe shatërvanët do të jenë në errësirë çdo ditë pas orës 22:00.
Po ashtu për klientët jo familjarë, një masë tjetër është edhe gradimi i kondicionerit. Gjatë verës, kondicioneri nuk duhet të gradohet në temperaturë më të ulët se 27 gradë Celsius, ndërsa gjatë dimrit nuk duhet të jetë më i lartë se 21 gradë.
Dokumenti detyron klientët buxhetorë të reduktojnë konsumin e energjisë elektrike të godinave të tyre, në masën 15%, krahasuar me muajin përkatës të një viti më parë, ndërsa në të kundërt do të gjobiten:
“Mosarritja e përsëritur në dy muaj e masës së kursimit të energjisë nga institucioni, shoqëria apo ndërmarrja konsiderohet shkelje administrative dhe dënohet me gjobë, në masën 50 000 lekë. Masa administrative i vendoset titullarit të institucionit, administratorit të shoqërisë apo ndërmarrjes, që ka përgjegjësi administrimi pronën përkatëse”.
Për klientët familjare
1. Agjencia për Eficencën e Energjisë financon projektet për instalimin e paneleve diellore, për ngrohjen e ujit sanitar për klientët familjare. Financimi përfshin jo më shumë se 70% te vlerës së impiantit dhe kostos së instalimit.
Financimi i masës mbështetëse bëhet vetëm nga të ardhurat për shërbime ndaj të tretëve, të arkëtuara nga agjencia gjatë vitit buxhetor. Fondet e pashfrytëzuara për këtë qëllim mbarten në vitin pasardhës.
2. Agjencia për Eficencën e Energjisë publikon në fazën e parë të proçesit subjektet, që kanë shfaqur interes për ofrimin e shërbimit të shitjes dhe të instalimit të paneleve diellore për ngrohjen e ujit të ngrohtë.
3. Agjencia për Eficencen e Energjisë në fazen e dytë realizon një proçedurë të thjeshtuar për përfitimin e financimit nga klientët familjare. Përzgjedhja e klientëve familjare bëhet duke marrë për bazë kohën e aplikimit.
4. Instalimi i paneleve diellore monitorohet nga Task-Forca e Energjisë.
5. Agjencia për Eficencën e Energjisë shpall në faqen e internetit rregullat dhe proçedurat e detajuara për përfitimin e financimit.
6. Rregullat, proçedurat dhe metodologjia për subjektet dhe klientët familjare, objekt të kësaj mase mbështetëse, përcaktohen me udhëzim të ministrit përgjegjës për energjinë.