Muaji qershor ka nisur me temperatura të larta. Meteorologia Anira Gjoni, thotë se paçka luhatjeve atmosferike gjatë pasdites së sotme dhe ditës së martë, temperaturat do të jenë të larta duke filluar që nga dita e mërkurë e kësaj jave.
“Java ka nisur me kushte të paqëndrueshme atmosferike, por duke filluar nga e mërkura do ketë kushte më të qëndrueshme atmosferike. Gjatë pasdites së sotme dhe ditën e martë pritet që të kemi reshje të dobëta në disa qarqe në vend, por temperaturat do të qëndrojnë të larta sa i takon kësaj jave dhe në vijim. Nesër në zonat bregdetare temperaturat do të jenë 26 gradë, 29 gradë në zonat e ulëta dhe në zonat malore 23 gradë celcius. Presim që qershori të jetë një muaj i nxehtë dhe më i thatë, nëse e krahasojmë me muajin majin. Këta muaj që kanë kaluar kanë qenë më të nxehtë sesa duhet që të ishin për stinën e pranverës”, tha ajo.
Kjo verë pritet të jetë e nxehtë sipas Gjonit, por jo në ato nivele që të konsiderohet si vera më e nxehtë që kemi pasur në vend. “Presim që vera të jetë e nxehtë, por jo në nivele alarmante që të cilësohet si vera më e nxehtë”, tha ajo.