Kryeministri Edi Rama po merr pjesë këtë të martë, më 11 nëntor, në konferencën shkencore të organizuar me rastin e 100-vjetorit të Bankës së Shqipërisë.
Në këtë event, marrin pjesë akademikë, ekonomistë dhe ekspertë nga Shqipëria e jashtë vendit, të cilët do të ndajnë analizat, studimet dhe vizionet e tyre mbi sfidat e ekonomisë moderne dhe të ardhmen e sistemit bankar shqiptar.
“Përshëndetje, në radhë të parë të gjithë miqve që kanë ardhur nga jashtë kufijve për të asistuar në këtë moment të rëndësishëm të jetës së Bankës së Shqipërisë, dhe më lejoni ta nis duke cituar dikë që për ju të gjithë është një nga pikat e referimit: John Caines, i cili thoshte se në planin afatgjatë jeta është afatshkurtër dhe detyra e Bankës Qendrore është pikërisht që të garantojë që, në afatshkurtër, gjithçka të jetë brenda kornizës së një afati të gjatë. Duke ardhur në këtë moment celebrimi, mendoja se BSH-ja është, ndoshta, ndër shumë e pakta institucione të Republikës sonë që mund të quhet i tillë me plot gojën: institucion. Në atë kuptim dhe me ato standarde që kemi parasysh kur flasim për institucionet që i duhen një vendi dhe që bëjnë që ky vend të përmbushë kriteret e të qenurit një vend në botën e zhvilluar dhe në tryezën e familjes europiane,” tha Rama.