Kryeministri Edi Rama ka vijuar takimet elektorale në Bajram Curri. Takimi është hapur nga deputeti Ilir Beqaj, ndërsa është prezantuar kandidati Rexhë Biberaj.
Me tone pozitive, kryeministri Rama ka shprehur vlerësimin e tij për kreun aktual të Bashkisë Tropojë pavarësisht se i përket Partisë Demokratike.
“Me të kemi bërë disa punë të mira ndaj dua ta veçoj. Por më vjen keq që nuk është në garë jo për fajin e tij, por për shkak të grupimit të filxhanit.
Në këtë qytet unë kam qenë si student, kur kam bërë praktikën gjatë muajve të verës.
Kisha një mik piktor këtu, Nazmi Hoxhën dhe që atëherë jam dashuruar me bukuritë mahnitëse të këtij vendi” – tha Rama.
Ai u shpreh se Tropoja do të jetë porta e turizmit malor dhe se bukuritë e fjetura do të kthehen në burim pasurie për njerëzit.
Shefi i qeverisë thumboi edhe ish-kryeministrin Berisha duke u shprehur se tentoi ta shkatërronte vendlindjen e tij.
“Unë këtu jam në shtëpinë e atij dhe nuk do t’ia përmend emrin, por më vjen shumë keq ta them. Edhe Valbona që është një pasuri përrallore, u desh të vinim ne që të bllokonim masakrën e 11 hidrocentraleve. Sesi mund të firmosësh duke qenë edhe rritur këtu për 11 hidrocentrale, unë nuk e di” – tha kryeministri në Bajram Curri.