Kryeministri Edi Rama i ka dedikuar mëngjesin e sotëm një postim ministres së parë të konfirmuar në kabinetin qeveritar për mandatin e 4-t. Bëhet fjalë për Ina Majkon, kandidate për deputete na qarkun e Vlorës nën siglën e Partisë Socialiste, ndërsa ditën e djeshme është emëruar zëvëndësministre e Shëndetësisë dhe Mbrojtjes Sociale.
Ina Majko është bërë pjesë e strukturave të Partisë Socialiste pas përzgjedhjes nga komuniteti Rom, e para përfaqësuese e ardhur nga ky komunitet në nivelin e kabinetit qeveritar në historinë e Shqipërisë.
Ajo garoi për karrigen e deputetes në parlamentaret e 11 Majit në qarkun e Vlorës, por nuk arriti të fitonte mandatin. Rama në atë kohë dha premtimin e tij, që nëse Ina Majko nuk do të jetë deputete, patjetër që do të jetë pjesë e strukturave qeverisëse.
“Ina MAJKO është prurja e parë, ndër shumë të tjera në vijim të rrugës së re që hapi 11 maji, drejt Shqipërisë 2030 në Bashkimin Europian.
Ajo sapo është zgjedhur zëvendës ministre e Shëndetësisë dhe Mbrojtjes Sociale, pasi ka spikatur në skuadrën e 11 majit, mes atyre që edhe pse nuk ia dolën të fitonin një vend në Kuvendin e ri, ishin një vlerë e shtuar e PS2030 në përfaqësimin e komuniteteve e të grupeve të ndryshme të interesit.
Ina erdhi në skuadrën tonë si një përzgjedhje nga komuniteti Rom dhe si e para përfaqësuese e këtij komuniteti në nivelin e kabinetit qeveritar në historinë e vendit, ajo do të mbulojë pikërisht çështjet e njerëzve më në nevojë të shoqërisë në fushën e Mbrojtjes Sociale.
Historia e Ina Majkos është historia e një fëmije të rritur mes paragjykimesh e vështirësish të mëdha ekonomike dhe historia e një vajze të talentuar, plot energji e vendosmëri për t’ia dalë, e cila jo vetëm kreu me rezultate të larta studimet jashtë vendit dhe flet pesë gjuhë të huaja, por edhe u bë një zë i bukur i komunitetit të saj në platformat sociale.
Uroj që Ina të jetë një vlerë e shtuar edhe në punën e Ministrisë së Shëndetësisë dhe Mbrojtjes Sociale, e një mbështetje më shumë për familjet e fëmijët në nevojë”, shkruan Edi Rama në postim.