Një nga gatimet më të hershme tradicionale të zonës së Dibrës, është edhe pulë fshati me qull. Pula e fshatit me qull ka shije fantastike, nisur edhe nga mjeshtëria me të cilën përgatitet nga duart e nënave dhe gjysheve shqiptare.
Çdo turist i huaj që e provon, mahnitet nga shija e tij teksa përpiqet të marrë pas vetes recetën e përgatitjes.
Qulli me Pulë është një ndër gatimet speciale, i cili kënaq shijen dhe oreksin në secilën peiudhë të ditës teksa mbledh gjithë familjen rreth tryezës.
Përbërësit për të përgatitur pulën me qull:
-1 pulë 1 kg (Për një shije më të mirë përzgjidhni pulë fshati)
-100 ml vaj ulliri ose 200 gr gjalpë i freskët
-15 lugë gjelle miell misri,
-Kripë
-1.5 l lëng pule
-Piper të kuq dhe të zi sipas dëshirës
Përgatitja
Në një tigan, hedhim pak gjalpë ose dy lugë vaj ulliri, teksa shtojmë copat e mishit të pulës dhe i kalojmë për një skuqje shumë të lehtë për pak minuta. Pasi kthejmë pulën nga të dyja anët, hedhim ujin dhe kripën. Sipas dëshirës shtojmë edhe pak piper të zi dhe të kuq. E vendosim në zjarr për rreth një orë.
Në një tenxhere shkrijmë gjalpin ose vajin e ullirit. Hedhim miellin e misrit dhe e kaurdisim me një lugë druri derisa mielli të skuqet njëtrajtësisht. Kur mielli të marrë ngjyrë kafe të hapur, hedhim lëngun e përvëluar të pulës. E përziejmë shpesh në mënyrë që të mos krijohen kokrriza.
Masën e shtrijmë në një tavë, të cilën fillimisht e kemi lyer me gjalp. Gradojmë furrën 250 gradë dhe e lëmë të piqet për 15 minuta. Qullin e spërkasim me gjalpë, ndërsa mbi të vendosim mishin e pulës.