Gatuani picën që dëshironi në shtëpi, me përbërësit tuaj të preferuar. E shpejtë për t’u përgatitur, në më pak se 40 minuta!
Për brumin:
220 gr miell, 10 gr maja birre, 100 ml ujë, 1 lgj vaj, 1 lgj sheqer, 0.5 gr kripë
Për mbushjen:
100 ml salcë domate, Djath kaçkavall i butë, 500 gr spinaq, 2 thelpinj hudhër, 50 gr djath gorgonxola, 2 lgj stika pishe, 1 kokërr vezë
Përgatitja:
- Fillimisht në një enë të madhe përziejmë të gjithë përbërësit e brumit, i bashkojmë ato në një trup të vetëm dhe më pas e lemë brumin të pushojë për disa minuta.
- Ndërkohë vendosim spinaqin në ujë të vluar për 1-2 minuta dhe e largojmë menjëherë duke e vendosur në një enë të mbushur me ujë me akull. E shtrydhim mirë e më pas e grijmë hollë.
- Në një tigan me pak vaj ulliri vendosim spinaqin, hudhrat e grira dhe i kaurdisim për 2 minuta.
- Hapim petën, e lyejmë atë me pak salcë domate dhe shpërndajmë mbi salcë pak djath kaçkavall të butë.
- Shpërndajmë në mënyrë të rregullt spinaqin, thërrmojmë mbi të pak djath gorgonxola dhe stika pishe.
- Në fund hedhim një vezë sy në qendër dhe e vendosim picën në furrë në temperaturën 220 gradë Celsius për 10-15 minuta.
