Në konferencën “Gjithçka për Drejtësinë” me ministrat e Drejtësisë së vendeve të Ballkanit kryeministri Edi Rama duke folur për procesin e vetingut tha se mori fund ideja e të paprekshmeve, që hoqën njëherë e mirë gjytarët dhe prokurorët e korruptuar.
“Drejtësia mbi të gjitha, gjithçka ka të bëjë me të. Kjo na bën ne të jemi kaq të angazhuar e të përkushtuar për këtë dashuri të vështirë që kemi me BE. Ne nuk duhet të kënaqim Parisin, Hagën, apo kryeqytete tjera të BE, por kjo ka të bëjë me ndryshimin e vendit tonë, me faktin që vendet tona duhet të kenë demokraci funksionale, institucione të tilla. Po, korrupsioni për 30 vite është rritur dhe gjendet te politikanët, por më besoni që nuk ka të krahasuar me qarkun e ‘të paprekshme’, që u zhbë njëherë e mirë te gjyqtarët dhe prokurorët. Ata ishin forca e pushtetit të korrupsionit, që e garantonin dhe ushqenin korrupsionin”, tha Rama.
Ai foli dhe për mungesën e Gjykatës Kushtetuese, të cilën në kuadër të vettingut e konsideroi një sukses dhe jo dështim.
“Tani problemi është se nuk kemi Gjykatë Kushtetuese. Natyrisht që kur nuk ka një gjykatë të tillë nuk mund të jesh shtet anëtar i BE, por ne nuk po kërkojmë të jemi anëtar, kjo do dojë kohë. Fakti që në këtë moment nuk kemi Gjykatë Kushtetuese është sukses, jo dështim. Duke folur në këtë formë unë nuk ja hedh fajin Evropës, por kush tjetër më shumë se Franca mund të thotë që gjërat nuk po funksionojnë në Evropë. Nuk ka se si do ta kishim bërë Reformën në Drejtësi, pa pasur në krah SHBA dhe BE, por edhe dëshirën tonë për të qenë pjesë e familjes evropiane. Nuk do ia kishim dalë”, tha Rama.