Regjistri i gjendjes civile nuk punon. Për momentin aty nuk mund të regjistrohet asnjë fëmijë i porsalindur.
Gazeta Si e mësoi këtë problem nga shqetësimi i disa prindërve të rinj.
Por lajmi është i konfirmuar edhe nga institucionet. Drejtori i Përgjithshëm i Gjendjes Civile Bledar Doracaj i tha gazetës se në sistem janë krijuar probleme me adresat e pasakta, por shpreson që problemi të zgjidhet sa më shpejt të jetë i mundur.
Gazeta mësoi se për shkak të bllokimit momental të regjistrit të gjendjes civile nuk mund të bëhen asnjë veprim tjetër.
“Çdo gjë ka një kosto në ne po punojmë 24 orë që të zgjidhim problemet rast pas rasti. Po punohet për adresat e prindërve që janë të pa sakta. Është një problem shqiptar prej shumë vitesh me adresat të pa sakta dhe ne tani, po bëjmë një listë adresash që kanë dhënë disa prindër. Adresat duhet të përditësohen nga zyra e urbanistikës. Besoj se ky problem do të zgjidhet çështje ditësh,” shprehet Doracaj.
Adresat e pa sakta kanë qenë një problem prej kohësh në vendin tonë. Edhe pse që prej vitit 2015 është miratuar projektligji për regjistrimin e adresave, ende ka adresa të pasakta që më pas sjellin shqetësime të tjera.
Për sa i përket regjistri, një nga shqetësimet më kryesore të prindërve ishte për foshnjat e sapo lindura nëse ata mund të shkonin në konsultore për vaksinat edhe pse nuk janë të regjistruar në gjendjen civile.
Gazeta pyeti ministrinë e Shëndetësisë e cila u përgjigje se “ky fenomen nuk do të ndikojë në konsultoret e fëmijëve, për vizitat e ndryshme që mund të kryejnë pasi foshnjat vaksinohen që në materniteti dhe vetëm pas dy muajve ju duhet të rikthehen.” Dhe deri atëherë institucionet shpresojnë që problemi të zgjidhet.