Një specie e rrallë është shpëtuar dhe është dërguar në Kopshtin Zoologjik të Tiranës. E cilësuar në rrezik për shkak të numrit gjithnjë e më të pakët në rajonin e Ballkanit, rrëqebulli vitet e fundit është marrë nën mbrojtje për ta shpëtuar nga zhdukja.
Ministria e Turizmit dhe Mjedisit se bashku me organizatën e mbrojtjes së kafshëve kanë mundur të shpëtojnë një rrëqebull dhe ta transferojnë nga Shkodra drejt Kopshtit Zoologjik të Tiranës.
Kjo kafshë e rrallë në zhdukje, do të strehohet përkohësisht në një nga dhomat ekzistuese të kopshtit zoologjik. PPNEA nëpërmjet një postimi në rrjetet sociale bën me dije se po ndihmon institucionet përgjegjëse për ndërtimin e një ambienti të ri, i cili do të përmbushë kushtet optimale për strehimin përfundimtar të këtij nënlloji të rrezikuar në mënyrë kritike për zhdukje.
Nisur nga fakti që rrëqebulli ka njërën këmbë të gjymtuar nga kapja me lak e para 10 viteve dhe nga mbajtja në izolim për një periudhë të gjatë kohore, nuk ka mundësi rilëshimi të kësaj kafshe në natyrë.
Aktualisht, më pak se 40 rrëqebuj ballkanikë kanë mbetur në rajon, ku shumica prej tyre gjenden në Malet e Munellës së Shqipërisë dhe në Parkun Kombëtar të Mavrovës në Maqedoni, si dhe në Kosovë, ku janë gjetur dy rrëqebuj në Bjeshkët e Rugovës.