Ish-presidenti Rexhep Meidani priti në një takim Martin Vulaj, i cili ka ardhur në Tiranë. Ai është Presidenti i Këshillit të Marrëdhënieve Shqiptaro-Amerikane. Një takim ky për forcimin e marrëdhënieve mes Shqipërisë, Kosovës e diasporës shqiptare në SHBA.
Meidani theksoi se e lidh një miqësi dhe bashkëpunim i gjatë daton që nga periudha pas Luftës së Kosovës. Ai shprehu mirënjohjen për mbështetjen e tyre të vazhdueshme për çështjen shqiptare.
”Martin Vulaj dhe Ilir Rusi kanë qenë gjithmonë mbështetës të palëkundur të çështjes shqiptare dhe të Kosovës. Në ditët e vështira pas Luftës së Kosovës, bashkëpunimi ynë ka qenë i rëndësishëm për të forcuar pozicionin e shqiptarëve në arenën ndërkombëtare. Kontributi i Këshillit të Marrëdhënieve Shqiptaro-Amerikane ka qenë i çmuar edhe për ndihmën konkrete në procese të rëndësishme për Kosovën”, u shpreh Meidani.
Të pranishmit u shoqëruan në këtë takim nga ambasadori i Shqipërisë në Shkup, Denion Meidani. Ai cili theksoi rëndësinë e rolit të diasporës shqiptare në SHBA për stabilitetin dhe integrimin e rajonit në strukturat euroatlantike. Vulaj theksoi se Këshilli mbetet i përkushtuar për të vijuar mbështetjen ndaj Kosovës dhe forcimin e partneritetit mes Shqipërisë dhe SHBA-ve.
Takimi shënoi një moment të rëndësishëm në forcimin e bashkëpunimit mes Shqipërisë dhe diasporës shqiptare.