“Rinasi”/ Gazetari: Shefi i shërbimit sekret grek erdhi në Tiranë

Gazetari Artan Hoxha duke folur për grabitjen e ndodhur në aeroportin “Nënë Tereza” në Rinas tha se vetëm dy muaj para se të ndodhte grabitja, në Tiranë ka ardhur drejtori i shërbimit sekret grek, i cili ka qëndruar dy ditë në vendin tonë.
Sipas gazetarit, me autoritetet shqiptare ai ka diskutuar pikërisht sigurinë e aeroportit, e cila kishte nxjerrë probleme dhe për ta, e ndër të tjera pjesë e diskutimeve kanë qenë edhe grupi i cili e realizoi grabitjen. “Dy muaj para se të ndodhnin këto ngjarje në Tiranë ka ardhur drejtori i shërbimit sekret grek dhe një nga çështjet e diskutuara ka qenë siguria e Aeroportit të Rinasit, e cila kishte nxjerrë probleme dhe për ta. Eshtë diskutuar edhe çështja e personave të përfshirë në grabitje sepse është i njëjti grup që theu sigurinë në burgun grek në vitin 2013  dhe u arratis. Ky grup, që për gjashtë vite me radhë ishte në objektivin e autoriteteve greke, i ka detyruar zyrtarët grek që të kërkojnë ndihmën e autoriteteve shqiptare”, tha gazetari Hoxha në emisionin “Java” në TVSH.