Nga Demokracia Rinore te Inovacioni, nga Startup-et te Garancia Rinore dhe Mbështetja Studentore. Me këto tema nisi takimi i organizuar nga Ministrja e Shtetit për Rininë dhe Fëmijët, Bora Muzhaqi, në sheshin “Italia”.
Të rinjtë – nxënës, studentë dhe profesionistë të sapodiplomuar – morën pjesë aktivisht në këtë event ku u prezantuan programet prioritare të Qeverisë.
Ministrja Muzhaqi theksoi se mbështetja për të rinjtë me programe konkrete është një mënyrë për të shpërblyer angazhimin e tyre.
“Kemi disa shtylla shumë të rëndësishme ku Qeveria investon për të rinjtë. Një prej tyre është demokracia dhe pjesëmarrja e tyre në vendimmarrje. Kemi ndërtuar 61 Këshilla Rinorë Vendorë dhe Këshillin Kombëtar Rinor, ku të rinjtë mund të angazhohen realisht në vendimmarrje dhe të zhvillojnë takime me kryetarët e bashkive. Kemi gjithashtu Këshillat Studentorë dhe Parlamentin e Nxënësve” u shpreh Muzhaqi.
Më tej, ajo ndaloi te ndryshimet në Ligjin për Rininë, duke prezantuar tre programe të reja që fuqizojnë mbështetjen për të rinjtë. “Me Programin e Nismave Komunitare do të ofrojmë financim të dedikuar për veprimtarinë e strukturave rinore, për projekte të drejtuara nga të rinjtë për të rinjtë. Do të mbështesim rreth 500 të rinj çdo vit me projekte konkrete ” deklaroi ministrja.
Në vijim, Muzhaqi theksoi rëndësinë e Garancisë Rinore dhe Programit Kombëtar të Praktikave të Punës.