Robert F Kennedy Jr, pasardhësi i familjes Demokratike Kennedy, ka pezulluar fushatën e tij elektorale për të mbështetur kandidatin për president të SHBA, Donald Trump.
Kennedy tha se ai do të heqë emrin e tij nga fleta e votimit në disa shtetet, por do të mbetet në fletëvotimin në shtetet e tjera dhe disa votues ende mund të votojnë për të.
Sipas “The Guardian” në një deklaratë të dhënë Kennedy tha se do t’i jepte mbështetjen e tij Trump pas disa bisedash që kishte bërë me të, një prej cilave u zhvillua disa ditë pasi kandidati republikan i mbijetoi një atentati më 13 korrik.
“Unë u befasova kur zbulova se ne jemi në një linjë për shumë çështje kyçe,” tha Kennedy, duke shpjeguar se ai dhe Trump u takuan disa herë. “Në ato takime ai sugjeroi që të bashkojmë forcat si parti uniteti. Ne folëm për ekipin e rivalëve të Abraham Lincoln. Kjo marrëveshje do të na lejonte të mos pajtoheshim publikisht dhe privatisht dhe seriozisht, nëse është e nevojshme, për çështjet për të cilat ne kemi dallime, ndërsa punojmë së bashku për çështjet ekzistenciale për të cilat jemi në përputhje”, tha ai.
Robert F. Kennedy Jr vlerësoi gjithashtu thirrjen e Trump për t’i dhënë fund luftës së Rusisë me Ukrainën. Kennedy tha se lufta ishte një nga tre “kauzat e mëdha” që e shtynë atë të hynte në garë dhe në fund të jepte mbështetjen e tij për Trumpin.