Të paktën 3,000 kimikate më shumë janë të pranishme në plastikë, nga paketimi i ushqimit, te lodrat e fëmijëve, e deri te pajisjet mjekësore, zbuloi një raport. Ndërsa Programi i Kombeve të Bashkuara për Mjedisin (UNEP) dhe institucione të tjera kishin identifikuar më parë 13,000 kimikate plastike, raporti i një ekipi shkencëtarësh evropianë gjeti më shumë se 16,000 kimikate, një e katërta e të cilave mendohet të jenë të rrezikshme për shëndetin e njeriut dhe mjedisin.
Autori kryesor, Martin Wagner, një toksikolog mjedisor në Universitetin Norvegjez të Shkencës dhe Teknologjisë, tha se qindra e mijëra kimikate mund të gjenden vetëm në një produkt plastik.
Raporti, i financuar nga Këshilli Kërkimor Norvegjez, vjen ndërsa ligjvënësit po përballen me hartimin e traktatit të parë në botë për të trajtuar ndotjen në rritje nga plastika, pasi rreth 400 milionë ton mbetje plastike prodhohen çdo vit.
Plastika mund të përhapet në mjedis, duke përfshirë ujin dhe ushqimin që njerëzit konsumojnë, duke çuar në probleme shëndetësore, që lidhen me fertilitetin dhe sëmundjet kardiovaskulare.
Përfaqësues të industrisë kanë thënë se çdo traktat duhet të promovojë riciklimin dhe ripërdorimin e plastikës. Por, shkencëtarët theksuan nevojën për një transparencë më të madhe për atë që kimikatet, po shkojnë në plastikë, përfshirë produktet e ricikluara. Vetëm 6% e kimikateve që gjenden në plastikë janë të rregulluara ndërkombëtarisht.
Të gjitha problematikat duhet të adresohen në një traktat ndërkombëtar, negociatat për të cilin do të vijojnë muajin e ardhshëm në Otava të Kanadasë, me qëllim finalizimin e tij në muajin dhjetor në Korenë e Jugut.