Luftimet midis ushtarëve izraelitë dhe militantëve islamikë të Hamasit vazhdojnë ende në zonën kufitare me Rripin e Gazës, ndërsa Izraeli ka kërcënuar të vendosë një “rrethim të plotë” të rripit bregdetar pasi pranoi se numri i sulmuesve palestinezë që kanë kaluar kufirin është rritur.
Helikopterët sulmues izraelitë goditën gjithashtu objektiva në Liban, pasi ushtria tha se ushtarët qëlluan disa të dyshuar të armatosur që kishin hyrë në Izrael përtej kufirit me fqinjin verior.
Kryeministri Benjamin Netanyahu, ndërkohë tha të shtunën se hakmarrja masive e Izraelit për sulmet vdekjeprurëse nga Hamasi “do të ndryshojnë Lindjen e Mesme”.
“Ajo më të cilën do të përballet Hamasi do të jetë e ashpër dhe e tmerrshme”, tha sot Netanyahu gjatë një takimi me zyrtarë të Izraelit jugor, sipas një deklarate.
“Ne jemi vetëm në fillim”, shtoi ai.
Ministri i Mbrojtjes Yoav Gallant, ndërkohë tha se Izraeli do të vendoste një “rrethim të plotë” në Rripin e Gazës.
Sulmet ajrore izraelite kanë goditur objektiva në Rripin e Gazës në përgjigje të sulmeve të nisura nga Hamasi të shtunën që shkaktuan vdekjen e më shumë se 800 izraelitëve, gjakderdhja më e keqe civile në historinë e vendit.
Gallant tha se nuk do të ketë “energji elektrike, ushqim, karburant”.
Ministri i Energjisë, Israel Katz, urdhëroi gjithashtu ndërprerjen e furnizimit me ujë në Rripin e Gazës. Ujërat nëntokësore në Rripin e Gazës janë shumë të kripura.
Më shumë se 2 milionë njerëz jetojnë në kushte të këqija në Rripin e Gazës, që shtrihet për rreth 40 kilometra përgjatë Detit Mesdhe.