Ish-deputetja demokrate Rudina Hajdari, duke folur për zhvillimet e fundit në kampin blu, theksoi se fokusi kryesor duhet të jetë aksioni kundër qeverisë Rama.
Ajo u shpreh në një intervistë se intrigat e përçarjes duhet të marrin fund dhe se demokratët duhet të mbajnë lart flamurin e shpresës së qytetarëve.
“Të gjitha lëvizjet nuk i shkojnë për së mbari një opozitë. Nëse flasim për opozitë, duhet të flasim për opozitë në kushte kur qeveria është shumë e konsumuar. Duke e përçarë opozitën dhe duke gjetur taktika të ndryshëm për ta përçarë, disa njerëz bien shumë kollaj dhe e kanë çuar opozitën në përçarje.
Në kampin ku jam unë, ne kemi qenë shumë të hapur me demokratët dhe opozita të paktën siç e thashë, në kuptimin që ka mbushur sheshet, ndaj ne duhet të punojmë shumë që mos të ndalemi në këtë mision që kemi përpara dhe të ndalojmë intrigat që na ndalojnë në këtë mision”, tha Hajdari.