Kryeministri Edi Rama ka shpërndarë një video ku thekson se më 16 maj, liderët e kontinentit evropian do të mbërrijnë në Shqipëri për të marrë pjesë në Samitin e Komunitetit Politik Evropian, një ngjarje që ai e sheh si një moment krenarie.
Videoja nis me një mesazh të Presidentit francez Emmanuel Macron, i cili nënvizon rëndësinë e kësaj organizate të re evropiane, e cila synon të mundësojë bashkëpunimin ndërmjet kombeve demokratike të Evropës, duke u përqendruar në fusha të tilla si siguria, energjia, transporti, investimet dhe lëvizja e njerëzve, me theks të veçantë tek rinia.
Në postimin e tij, Rama shprehet: “Mirëmëngjes dhe me krenarinë për faktin se më 16 maj, liderët e të gjithë kontinentit tonë të demokracive, nga Londra në Kiev e nga Oslo në Ankara, do të mblidhen në zemër të Tiranës për Samitin e Komunitetit Politik Evropian. Ju uroj një ditë të mbarë!”