Policia e Sarandës ka gjetur një pistoletë, e cila ishte brenda në një çantë krahu, në vendin ku mesditën e kësaj të enjte u plagosën me armë zjarri dy të rinj nga Kamza.
Burime policore bëjnë me dije se arma dyshohet se i përket njërit prej të plagosurëve, Ernest Lamës, 24 vjeç, ose Gëzim Hoxhajt, 32 vjeç.
Policia po heton lidhjet e mundshme të kësaj ngjarjeje me episode të tjera kriminale të ndodhura në Sarandë, ndërsa, në bashkëpunim me FNSH-në, po zhvillohen kontrolle të shumta në qytet.
Në vendin e ngjarjes janë sekuestruar 4 gëzhoja të shkrepura, që dyshohet të jenë qëlluar nga arma e autorit të plagosjes, të cilën ai e ka marrë me vete duke u larguar.
Për këtë ngjarje, janë shpallur në kërkim Ramadan Zoto, alias Ramadan Canaj, 42 vjeç, dhe vëllai i tij, Erjon Canaj, 35 vjeç, të dy nga Saranda dhe me precedentë penalë të mëparshëm.
Burime konfidenciale nuk përjashtojnë mundësinë e përfshirjes së personave të tjerë në ngjarje, për të cilët hetimet janë në vijim.
Të plagosurit ndodhen në gjendje të rëndë shëndetësore dhe po marrin trajtim në Spitalin e Traumës në Tiranë, pasi u transportuan me helikopter nga Saranda.