Nuk ka paqe për Diego Armando Maradonën as në botën e përtejme. Pavarësisht se ka ndërruar jetë më shumë se një vit më parë, në fakt, “El Diez” përbën sërish lajm.
Siç zbulohet nga revista argjentinase “Caras”, në fakt, fëmijët e tij, Diego Jr. Dalma, Gianinna, Jana dhe Diego Fernando (të përfaqësuar nga nëna e tyre Verónica Ojeda) zbuluan një surprizë të pakëndshme kur javën e kaluar u takuan për hapjen e dy kontejnerëve të sjellë nga Dubai me sendet personale të babait të tyre: bizhuteritë dhe orët luksoze ishin zhdukur.
Kjo është historia që tregon gazetari argjentinas, Carlos Monti: “Dyert u hapën, aty ishin fëmijët e Diegos, së bashku me Verónica Ojedan. Diego Jr. ishte atje, erdhi në Argjentinë sepse donte të shkonte te varri i babait të tij për t’u lutur.
SuperSport shkruan se çështja është se kur i hapën, panë bluza, pantallona, kapele, dhurata, trofe, gjithçka. Por dikush tha: “Më falni, ku janë orët e Diegos? Ku janë xhevahiret e Diegos dhe ku është zinxhiri i artë i Diegos?
Nga rikonstruksioni i ngjarjeve, kutia me objektet personale të Maradonës i ishte dorëzuar Romina Rodríguezit, e njohur më mirë si Monona, kuzhinierja që jetonte në Dubai me futbollistin, në mënyrë që ajo t’ia dorëzonte Claudia Villafañes. Mungesa e këtyre aseteve çoi në hapjen e një dosjeje gjyqësore: këto janë ora të markës zvicerane Hublot King Power Maradona, që në vitin 2012 kishin vlerën 43 600 dollarë.