Ministri i Shtetit për Marrëdhëniet me Parlamentin, Taulant Balla e quan një ditë historike ratifikimin e Marrëveshjes së Pensioneve në Senatin Italian. Balla i cili ndodhej në sallë për të ndjekur diskutimet dhe votimin, tha se kjo është një ditë historike e rëndësishme jo vetëm për 500 mijë bashkatdhetarët përfitues të kësaj marrëveshjeje, por është një ditë e rëndësishme edhe për familjarët e tyre kudo që ndodhen.
Senati e miratoi me 129 vota Marrëveshjen e Pensioneve Shqipëri-Itali, e cila më herët kishte kaluar edhe në Dhomën e Deputetëve të Parlamentit Italian. Prania e ministrit Balla dhe ambasadores së Shqipërisë në Itali, Anila Bitri Lani në sallë u përshëndet nga kryetarja e seancës dhe deputetët në sallë.
“Prej këtij momenti, pas firmosjes nga presidenti Mattarella, marrëveshja tanimë hyn në fuqi dhe do të fillojë menjëherë zbatimi i saj nga të dyja qeveritë, qeveria e Republikës së Italisë dhe qeveria e Republikës së Shqipërisë. Kjo është një ditë e rëndësishme e finalizimit të një pune shumëvjeçare sa i përket materializimit të kësaj marrëveshjeje, ndaj dua t’ju dërgoj një përqafim të gjithë bashkatdhetarëve tanë këtu në Itali duke i falënderuar”,-deklaroi Balla.