Kryetarja e bashkisë së Durrësit Emiriana Sako është e para grua të cilës Partia Socialiste i beson drejtimin e një prej qarqeve më të rëndësishme të vendit, qarkun e Durrësit nga i cili zgjidhen 14 deputetë. Në emisionin “Vendi Im”, Sako shpjegon se PS është gati për fitore në zgjedhjet e 11 majit.
“Sigurisht kjo është një sfidë tjetër për mua, personale, sepse është një besim i jashtëzakonshëm i dhënë nga Partia Socialiste dhe Kryeministri Edi Rama. Ne do të punojmë ashtu siç kemi punuar, Durrësi ka një skuadër solide e cila angazhohet në të gjitja proceset elektorale. Sigurisht ne kemi filluar nga puna për organizimin dhe përgatitjet për fushatën e vitit që vjen dhe kemi objektiva të cilat duhet t’i ruajmë, dhe pse jo edhe t’i superojmë për të bërë të mundur zbatimin e atij vizioni të Edi Ramës por edhe për vizionin për “Shqipërinë 2030” ku edhe Durrësi si një qytet i madh do të ketë rolin dhe kontributin e tij.
-Ju, në mos gaboj jeni drejtuesja e parë grua në qarkun e Durrësit, mendoni se do t’ju penalizojë kjo, apo e shihni si një gjë që nuk do të ndikojë se njihnin edhe mentalitetin e qytetit?
-Nuk mendoj se është penalitet, mund të jetë deri diku edhe avantazh. Me të gjithë kryesinë e PS, të gjithë koordinatorët dhe anëtarin më të thjeshtë të PS, ne kemi pasir një angazhim maksimal në këto vite, sepse përveç zgjedhjeve të 2021, Durrësi ka qenë në zgjedhje në 2022, në 2023, kemi vazhduar procesin e rienergjizimit në parti dhe kemi pasur nja angazhim dhe një frymë skuadre në vazhdimësi dhe patjetër mendojmë që do të kemi sukses edhe në zgjedhjet që na presin,” theksoi Emirjana Sako e cila është drejtuese politike për qarkun e Durrësit.
PD ka fituar në Durrës në vitin 2005 në një fitore që mbahet mend sepse ajo mori të gjithë deputët në këtë zonë ndërsa PS asokohe e drejtuar nga Fatos Nano nuk arriti të marrë asnjë deputet në këtë qytet, kur aplikohej sistemi mazhoritar. Në vitin 2009 PD fitoi 7 deputetë ndërsa PS 5, por prej atij momenti PS ka fituar çdo betejë elektorale në Durrës në zgjedhjet lokale apo parlamentare.
Në zgjedhjet e fundit, në 25 prillin e vitit 2021, PS fitoi 8 deputetë, ndërsa PD mori vetëm 6.