Mesfushori i Kombëtares, Kristjan Asllani bashkë me trajnerin Sylvinho, kanë dalë në një konferencë për shtyp para takimit të Nations League me Gjeorgjinë, nesër në ”Air Albania”.
”Ne nuk kemi frikë. Gjeorgjia është ekip i madh dhe po rritet. Jemi përgatitur mirë, ndeshjen ndaj Ukrainës duhet ta harrojmë dhe të shikojmë përpara. Objektivi jonë është vetëm skuadra. Duam të grumbullojmë sa më shumë pikë të jetë e mundur. Dua të punoj sa më shumë, futbolli është bërë shumë fizik. Kemi grup të fortë, ne e dijmë çfarë synojmë. Zënka me Manaj për goditjen e dënimit. Unë dhe ai jemi shokë. Kemi bërë shaka për atë aksion. Jemi profesionistë, unë i kërkova falje”, tha ai.
Trajneri i kuqezinjëve, braziliani Silvinjo parashikon që sfida e nesërme Shqipëri-Gjeorgji të jetë një ndeshje shumë e bukur. Në konferencën për shtyp, trajneri i Kombëtares Shqiptare vlerësoi ekipin gjeorgjian duke thënë se është skuadër e organizuar.
“Ky është një grup shumë i ekulibruar. Gjeorgjia është ekip shumë i organizuar. Trajneri ka bërë punë shumë të mirë. Çdo trajner e përgatit ndeshjen për ta fituar, në mos do të marri barazimin. Mendoj që do jetë një ndeshje shumë e bukur. Stadiumi do jetë plot me tifozë. Gjeorgjia është skuadër shumë e fortë”, u shpreh Silvinjo.