Endrit Shabani, kryetar i partisë Nisma Thurje, gjatë një interviste televizive, shpjegoi arsyet pse partia që drejton nuk bashkëpunon me Partinë Demokratike dhe Partinë e Lirisë.
Ai vuri në dukje përkushtimin e Nismës Thurje ndaj mbështetjes së SPAK, duke e konsideruar atë një mekanizëm të rëndësishëm për luftën kundër korrupsionit dhe krimit të organizuar.
“Ne duam që prokurorët e SPAK të shtohen akoma më shumë. Ne e mbështesim SPAK. Ndërsa Sali Berisha dhe Ilir Meta, mesa duket, nuk janë aq dashamirës ndaj këtij institucioni. Në këtë moment, bashkëpunimi me PD është i pamundur, për sa kohë Berisha mbetet një figurë qendrore dhe një subjekt i SPAK.”, u shpreh ai.
Ai theksoi se për Nismën Thurje, bashkëpunimi duhet të bazohet në parime të pastra dhe refuzoi çdo aleancë që do të minonte vlerat që partia promovon.
“Po u bashkuam me Berishën, ne futemi në një rrugë tjetër, që nuk është në përputhje me parimet tona. Ndryshe nga Berisha, unë jam fringo,” përfundoi Shabani, duke sinjalizuar një qëndrim të qartë për të ruajtur pavarësinë dhe integritetin e partisë së tij.