Këngëtarja Sheila Haxhiraj feston sot ditëlindjen ashtu siç ajo kurrë nuk do të kishte dashur, pa vëllain e saj, Henri Haxhirajn, ish-efektivi i Gardës i cili vrau veten me armën e shërbimit në muajin tetor.
Kjo ditëlindje e 31-të e gjeti Sheilën të shkatërruar, me zemrën “copë e çikë” dhe me sytë drejtuar nga qielli. Në telefonin e saj këtë vit mungoi urimi nga njeriu i saj i zemrës, mungoi kënga e ditëlindjes, mungoi përqafimi i ngrohtë nga gjysma e shpirtit të saj, vëllai.
E në këtë ditë të veçantë për të, Sheila ka zgjedhur që të publikojë këngën e saj të re, që i dedikohet pikërisht vëllait të saj të ndjerë, ku duket “e dërrmuar” me mallin që po i “djeg shpirtin” çdo ditë.
Sheila ka treguar mes rreshtave dhe me zërin e saj se çfarë boshllëku dhe dhimbje ka lënë në familje Henri me ikjen e tij.
Këngëtarja ka treguar mes rreshtave të këngës të titulluar “Nën Dritën e Hënës” dhe me zërin e saj se çfarë boshllëku dhe dhimbje ka lënë në familje Henri me ikjen e tij.
“O engjëlli im je drita në errësirë, ta dish sa malli më ka marrë nuk po të them dot lamtumirë. Çdo ditë mami të kërkon se zemrën ia ke ti, babi qan me foton a po më vjen djali në shtëpi”, thotë Sheila në një pjesë të këngës.
Ndërsa, përmes një postimi në rrjetin e saj social “Instagram”, Sheila Haxhiraj, teksa ka njoftuar publikimin e këngës, tregon dhe për mungesën e të vëllait.
““Nën Dritën e Hënës”
Si çdo vit për ditëlindje mezi prisja urimin tënd të parin. Më mungon urimi dhe përqafimi jot sot edhe pse e di që ti në atë parajsë gjëndesh kudo me mua. Sot dua unë të të bëj ty një dhurate,atë qe unë di të bej me mirë.
Një këng shpirti për ty shpirti im!” – shkruan këngëtarja.