Pas ngjarjes së ndodhur ditën e djeshme pranë aeroportit “Nënë Tereza”, ku mbeti i plagosur punonjësi i Agjencisë së Mbikëqyrjes Policore, M.Sh., institucioni ka reaguar zyrtarisht. AMP njofton se ka nisur menjëherë verifikimet e brendshme mbi procedurat administrative dhe procesin e rekrutimit të punonjësit, ndërsa Drejtori i Përgjithshëm, Eduart Merkaj, ka urdhëruar pezullimin e zinxhirit komandues të Forcës së Posaçme Operacionale deri në zbardhjen e plotë të ngjarjes.
Reagim i Agjencisë së Mbikëqyrjes Policore:
Nisur nga interesi i medias dhe ndjeshmëria e ngjarjes të ndodhur ditën e djeshme në rrethrrotullimin pranë aeroportit “Nënë Tereza”, ku rezulton i përfshirë edhe punonjësi i Agjencisë së Mbikëqyrjes Policore, M.Sh, i cili ka mbetur i plagosur dhe po merr ndihmën mjekësore, AMP ka nisur menjëherë verifikimin e brendshëm të procedurave administrative të ndjekura si edhe praktikën e plotë me agjencitë përkatëse dhe Policinë e Shtetit, në lidhje me procedurën e rekrutimit tij, prej shtatorit 2025.
Ndërkohë Drejtori i Përgjithshëm i Agjencisë së Mbikëqyrjes Policore, Eduart Merkaj, ka urdhëruar pezullimin e zinxhirit komandues të strukturës së Forcës së Posaçme Operacionale të AMP-së deri në zbardhjen e plotë të rrethanave të ngjarjes.
Në komunikimet në vijim do të bëhen me dije rezultatet e këtyre veprimeve.
