Prokuroria e Posaçme ka përfunduar hetimet dhe ka dërguar për gjykim grupin e parë me 9 persona të akuzuar për trafik ndërkombëtar droge, të arrestuar në kuadër të operacionit “Shpirti” ndërkohë që vijojnë hetimet për 28 persona të tjetër të dyshuar si pjesë e rrjetit.
Mbyllja e hetimeve vjen pak ditë pasi prokurorët e çështjes u kthyen nga shteti italian ku ndodhet një pjesë e të arrestuarve dhe madje 2 të penduarit të cilët kanë pranuar bashkëpunimin me policinë.
Arrestimi i tyre u bë në kuadër të hetimeve të përbashkëta me shtetin italian ku sipas Prokurorisë janë dokumentuar disa episode trafikimi të lëndës narkotike të sekuestruara në Shqipëri dhe Itali në një sasi prej 6 ton lëndë narkotike e llojit kanabis sativa, marijuanë, kokainë të cilat kapin vlerën e mbi 55 milionë euro për një sasi totale rreth 14 milionë dozash.
Në kuadër të këtij hetimi janë sekuestruar pasuri të paluajtshme dhe të luajtshme, subjekte tregtare, ambiente biznesi në një vlerë rreth 5 milionë euro.
Hetimet në lidhje me këtë procedim penal vazhdojnë për 28 persona të tjerë të arrestuar si dhe për persona të tjerë të përfshirë në këtë aktivitet.
Ndaj 9 të pandehurve rëndon akuza e kultivimit të bimëve narkotike në bashkëpunim në kuadër të grupit të strukturuar kriminal, trafikimi i narkotikëve, pastrimi i produkteve të veprës penale ose veprimtarisë kriminale, grup i strukturuar kriminal dhe kryerja e veprave kriminale nga organizata kriminale dhe grup i strukturuar kriminal.