Në ndeshjen ndaj Turqisë u hodhën një sërë sendesh të forta në fushë, pas humbjes që pësoi Shqipëria me Turqinë. Një episod i shëmtuar në “Loro Boriçi”, pas shënimit të golit të dytë nga turqit në minutën e 55-stë. Kjo mund ti kushtojë shtrenjtë Shqipërisë e cila rrezikon ose gjobë të majme ose dënim në fushë pa spektatorë.
Sa i përket Grupit H, e radhës është më 11 qershor, pikërisht Shqipëri-Moldavi, e parashikuar madje të zhvillohet në stadiumin e ri “Arena Kombëtare” në kryeqytet. Delegati i ndeshjes me siguri ka mbajtur shënim gjithçka dje, aq sa edhe fonia e stadiumit pas urdhrit të drejtuesve të FSHF-së nuk mjaftoi në ndërgjegjësimin e tifozërisë. “Lutemi të mos hidhni sende në fushë, pasi do të penalizohemi”, ishte thirrja nga fonia e stadiumit pas golit të dytë të Turqisë, por më kot pasi shishe të llojeve të ndryshme pushtuan një pjesë të fushës.