Kripa është parë prej kohësh si armiku kryesor për njerëzit që kanë probleme me zemrën, por jo vetëm me këtë kategori. Mjeku Alban Ylli, thotë se reduktimi i kripës me 5 gramë në ditë do të na shpëtonte nga hipertensioni dhe sëmundjet cerebrale.
“Nëse do të ulnim kripën në nivelet 5 gramë në ditë për person ne do të kursenim me mijëra vite jete të shëndetshme në Shqipëri, edhe miliona në botë. 5 gramë është rekomandimi i Organizatës Botërore të Shëndetësisë”,-thotë Ylli.
Ai tha se janë disa vende të rralla në Europë që konsiderojnë se 5 gramë janë shumë dhe është e pamundur ta ulin, por sidoqoftë është arritur një konsensus. Sipas të dhënave të grumbulluara nga ekspertët e Shëndetit Publik, shqiptarët e përdorin kripën 2-3 herë mbi normën e lejuar. Konkretisht nga 5 gramë në ditë ne priremi të konsumojmë të paktën 10 gramë por edhe më shumë sesa kaq.