Pas publikimit nga media të pamjeve nga shtesa e 4 dhomave pa leje që ish-kryetari i Bashkisë së Tiranës, Lulzim Basha ka bërë në apartamentin e tij në katin e 12-të që gjendet në rrugën “Dervish Hima”, Inspektorati i Mbrojtjes së Territorit tentoi të verifikonte në terren. Ish kryetari i Bashkisë së Tiranës dyshohet se ka ndërtuar 4 dhoma shtesë në pallatin ku ai banon, por ky i fundit nuk e lejoi IMT që të kryente detyrën.
Inspektorë të IMT-së u paraqitën gjatë ditës së sotme në apartamentin në pronësi të kreut të opozitës, për të bërë verifikimet e nevojshme nëse apartamenti i kryetarit të partisë më të madhe opozitare, PD, është në përputhje me dokumentacionin dhe planimetrinë mbi të cilin është dhënë leja e ndërtimit të pallatit.
Kreu i PD-së hodhi poshtë si të pavërtetë lajmin e shtesës në apartamentin e tij dhe akuzat se kishte abuzuar me detyrën, por nuk i lejoi inspektorët që të kryenin verifikimet. Nisur nga kjo, IMT-ja i dorëzoi kryetarit të Partisë Demokratike, Lulzim Basha një shkresë zyrtare ku i la 5 ditë afat për të dorëzuar gjithë dokumentacionin tekniko-ligjor për apartamentin e tij dhe shtesën që ka bërë me lejen që i dha vetes së vet në kohën që ishte kryetar i Bashkisë së Tiranës.