Pasi lajmëroi vendimin drastik të ndërprerjes së qarkullimit të automjeteve private nga e premtja deri të dielën në mesnatë, kryeministri Edi Rama ka reaguar sërish ndërsa ka bërë me dije se sipërmarrjet që kryejnë shërbime transporti mallrash apo shërbime furnizimi me mallra ushqimore apo farmaceutike duhet të akreditojë automjetet pranë drejtorisë së policisë.
Ky është një tjetër vendim i lajmëruar nga Rama për të bërë parandalimin e përhapjes së koronavirusit, i cili deri më tani në vendin tonë ka shënuar 23 të infektuar dhe një viktimë.
“Sipërmarrjet që kryejnë shërbime transporti mallrash apo shërbime furnizimi me mallra ushqimore apo farmaceutike në perimetrin tr-dr, duhet të akreditojnë automjetet e transportit të punonjësve të tyre, si edhe vetë punonjësit, emër për emër, në drejtorinë e përgjithshme të policisë së shtetit. Ndjesë 1000 herë po kjo luftë nuk fitohet ndryshe”, shkruan Rama.