Gazeta “Panorama” ka zbardhur vendimit për llogaritjen e pikëve për të qenë pjesë e Universitetit Bujqësor.
Janë tri komponentë mbi të cilët do të bazohet pranimi i studentëve të rinj në këtë universitet.
Në vendimin e zbardhur nga gazeta, kriteri i meritës, ai i rëndësisë, nota e lëndës me zgjedhje do të përcaktojnë fituesit në pesë fakultetet e Bujqësorit, bazuar mbi kuotat e paracaktuara nga secili. Ndonëse treguesit janë të njëjtë, pesha e tyre ndryshon. Diferencën e bëjnë koeficientët sipas profilit të shkollës së mesme, të cilat variojnë nga një fakultet në tjetrin.
Maturantët e interesuar, para se të aplikojnë, duhet të konsultohen më parë me formulën e përllogaritjes së pikëve (sipas tabelës përbri shkrimit) kuotat e pranimeve si dhe pikët e fituesit të fundit nga viti i kaluar për degët që synon. Kjo gjë iu vjen në ndihmë jo vetëm për të mos djegur preferenca, por edhe për të rritur mundësinë e të qenurit fitues, duke bërë vetë disa llogari.
LLOGARITJA E PIKËVE
Nota mesatare e gjimnazit (apo ajo që cilësohet si kriteri i meritës) bashkë me koeficientin e shkollës, prej nga vjen maturanti, përbëjnë 90% të peshës në formulën e përllogaritjes së pikëve në fakultetin më të madhe e të preferuar te Bujqësori, Ekonomia dhe Agrobiznesi. 10 përqindëshi i mbetur është për rezultatin e lëndës me zgjedhje, e cila duhet të jetë mundësisht e fushës së ekonomisë.
Të njëjtën formulë aplikon edhe Fakulteti i Bujqësisë dhe Mjedisit, me përjashtim të lëndëve preferenciale që janë Biologjia, Kimia dhe Fizika. Sakaq, diferencën e pikëve për pranimet në këto fakultete e bëjnë koeficientët e shkollave prej nga vijnë kandidatët. Ato janë të ndryshme për çdo profil për shkak të përputhshmërisë me fushat dhe programet e studimit. Përzgjedhja e kandidatëve fitues në Fakultetin e Bioteknologjisë dhe Ushqimit do të bazohet gjithashtu mbi kriterin e meritës, rëndësisë si dhe lëndën me zgjedhje, duke gjeneruar kësisoj një listë vlerësimi, e cila shpall fitues të renditurit me më shumë pikë, bazuar mbi kuotat e përcaktuara nga vetë fakulteti për çdo profil studimi.
Në këtë fakultet, përveç shkollës së mesme “Teknologjisë ushqimore” që ka koeficient 1, të gjitha profilet e tjera kanë peshë më të vogël. Te Fakulteti i Shkencave Pyjore, diferencën e pikëve, përveç koeficientit të maturantëve kandidatë për në universitet, do ta bëjë lënda me zgjedhje, e cila duhet të jetë Biologji, Fizikë ose Përpunim Druri për profilin me të njëjtin emër në këtë fakultet. Formula edhe te FSHP do të jetë e njëjtë.
Ndërsa fakulteti i mjekësisë veterinare, pranimet do të bëhen vetëm në bazë të meritës dhe rëndësisë. Më konkretisht, mesatarja e shkollës së mesme dhe koeficienti i shkollës prej nga vjen kandidati do të përbëjnë shumatoren e pikëve mbi bazën e të cilave do të vlerësohen. Për ata që synojnë të kryejnë studime të integruara 5-vjeçare për Veterinari, rezultati i lëndës me zgjedhje nuk do të ketë kurrfarë vlere.
KRITERET PËR 2019-2020
FAKULTETI I EKONOMISË DHE AGROBIZNESIT
Mes e gjimnazit * koeficient 0.9 + nota së lëndës
me zgjedhje në fushën e ekonomisë0.1
Ku:
Koeficienti – përcaktuar për shkollën nga vjen, sa i takon përputhshmërisë me fushat dhe programet e studimit në FEA
FAKULTETI I BUJQËSISË DHE MJEDISIT
F = { (Mesatare VKM * Koeficient Profili * 0.9) +
{Lënda me zgjedhje * 0.1}
Ku:
Mesatare VKM = (mesatarja e përgjithshme e shkollës së mesme + mesatare e Maturës Shtetërore)/
2
Koeficient Profili sipas llojit të shkollës së mesme që ka ndjekur kandidati
Lënda me zgjedhje: Biologji, Kimi, Fizikë
FAKULTETI I BIOTEKNOLOGJISË DHE USHQIMIT
A* K * 0.9 + B * 0.1
Ku:
A = Nota mesatare e shkollës së mesme
K = koeficienti i përcaktuar për shkollën nga vjen,
sa i takon përputhshmërisë me fushat dhe programet e studimit në Fakultetin e Bioteknologjisë dhe Ushqimit
B = nota e lëndës me zgjedhje
FAKULTETI I SHKENCAVE PYJORE
Mes e shkollës së mesme x koeficient (koeficienti i profilit të shkollës së mesme) x 0.9 + nota së lëndës me zgjedhje sipas programit të studimit x 0.1
Lëndët e preferuara me zgjedhje:
• BIOLOGJI për programin e studimit “Mbarështrim Pyjesh”
• FIZIKË ose PËRPUNIM DRURI për programin e studimit “Përpunim Druri” dhe “Dizajni i Mobiljeve dhe Interierit”
FAKULTETI I MJEKËSISË VETERINARE
Mesatare * Koeficient (Sipas profilit dhe programit të studimit që aplikohet); duke gjeneruar kësisoj një listë vlerësimi, e cila shpall si fitues të renditur sipas
kësaj liste brenda kuotave të paracaktuara nga FMV