Rivlerësimi i banesave të qytetarëve për t’i sjellë nga vlera historike në vlerën e tregut do të bëhet duke paguar tatim në masën 3 për qind, përgjatë periudhës Janar deri më 30 gusht 2020.
Përfitues llogaritet të jetë në rreth 50 mijë pronarë, ndërsa risi është që do të përfshihen në amnisti edhe objektet e palegalizuara.
Por ky vendim nuk ka kaluar pa debate brenda grupit parlamentar socialist. Do të ishte deputetja socialiste Blerina Gjylameti e cila do të propozonte në Komisionin e Ekonomisë masën prej 2 për qind, duke sigurar edhe mbështetjen e kolegëve të saj. Në këtë mënyrë në Komisionin e Ekonomisë do të rrëzohej propozimi me 3 për qind të bërë nga Kryetari i Komisionit të Ekonomisë, Arben Ahmetaj, si iniciator i amendamentit.
Edhe pse u duk një betejë e fituar në Komision dhe se seanca do të ishte vetëm një formalitet, burime nga PS bëjnë me dije se në seancë plenare me vendim grupi është vendosur për masën 3 për qind. Gjatë votimit nen për nen, Fatmir Xhafaj dhe deputetja Blerina Gjylametin do të votonin kundër duke mos iu bindur vendimit të grupit. Në tërësi, Gjylameti sikurse shihni edhe nga ky tabulat i siguruar nga tirananews.al do të votonte abstenim.
Ky votim i deputetes Gjylameti kundër amendamentit që e propozon tatimin në masën 3 për qind nga 2 që u votua në Komisionin e Ekonomisë, ka sjellë edhe reagimin e kreut të grupit parlamentar Taulant Balla, i cili do të kërkonte sqarime. Ndërsa ndaj Fatmir Xhafajt mësohet se nuk ka pasur asnjë reagim, ndonëse edhe ai mbështeti deputeten Gjylameti për të ulur edhe më tej tatimin për rivlerësimin e banesave nga ana e qytetarëve.
Aktualisht qytetarët paguajnë 15 për qind tatim të diferencës midis çmimit të shitjes dhe çmimit të blerjes. Ndërsa qeveria llogarit që me këtë amnisti, efekti në buxhet të jetë afro afro 3 miliardë lekë. / tirananews.al
