Ministrja e Drejtësisë Etilda Gjonaj në një deklaratë të posaçme për mediat i është përgjigjur akuzave të kryetares së LSI-së, Monika Kryemadhi.
“U sulmova me qëllimin për të sulmuar drejtësinë”, tha Gjonaj teksa shoti se nuk ndalet në detyrën e saj.
Përsa i përket skandalit me tenderat Gjonaj u shpreh: “Kush ka përgjegjësinë, ta mbajë sipas ligjit. I kërkoj prokurorisë të mos intimidohen nga sulmet e kujtdo që tenton të pengojë zbatimin e ligjit. Procedura tenderimi të kryera dhe tenderi i byzylykëve që është kthyer në gangrenë duhet zbardhur deri në fund. Të gjithë ata që kanë hedhur firmat të mbajnë përgjegjësinë e tyre. Drejtësia e plotë dhe drejtë deri në fund”, tha Gjonaj.
Ajo vijoi duke thënë se nuk duhet të nxitohet me deklarata dhe shpifje të opozitës, por duhet durim deri në zbardhjen e çështjes nga Prokuroria.
“Duhet të bëjmë durim të gjithë për të parë rezultatet e hetimit nga prokuroria e të mos nxitojnë me deklarata, shpifje e thirrje që nuk ndihmojnë hetimin e këtij procesi. Ofensiva tërësore e opozitës kundë Prokurorisë nuk është aspak e rastit dhe nuk ka të bëjë me atë që thuhen, po ato që dihen dhe që ishin e mbeten arsyeja e kundërvënies së vazhdueshme të kësaj opozite ndaj reformës në drejtësi”, tha Gjonaj.