Socialistët gati në të gjithë Shqipërinë kanë nisur fushatën për zgjedhjet lokale të 30 qershorit. Shumica e kandidatëve të këtij subjekti janë propozuar nga strukturat vendore të Partisë Socialiste, ndërkohë dhe Kryesia e PS-së ka vendosur që ato të nisin fushatën në bashkitë ku do të konkurojnë.
Kandidatët kanë kontaktuar anëtarësinë e PS-së, organizatat socialiste, këshillat socialistë të njësive administrative, delegatët e kongresit, antarët e Asamblesë Kombëtare dhe deputetët socialistë.
Takimet dhe mbledhjet kanë patur për qëllim skanimin e plotë të listave të votuesve, ku janë zgjedhësit dhe për kë votojnë, cilët janë votuesit e lëkundur, kush janë personat me infulencë, etj. Në ato bashki ku drejton PD janë mbledhur fakte rreth punës së tyre katër vjecare, cilat kanë qenë investimet e kryera, cili është rrethi nepotik që kryebashkiakët kanë ngritur, sa ata kanë abuzuar me fondet publike.
Ndërkohë strukturat e Partisë Demokratike vijojnë të jenë në pritje të udhëzimeve të qendrës. Burime brenda kësaj partie bëjnë me dije se në rrethe ka nisur një sondazh për kandidatët e mundshëm. Qytetarëve u janë ofruar tre a katër kandidatë për cdo bashki. Ndërkohë në mjedise publike vijojnë të përmenden emra të ndryshëm, disa madje janë vetshpallur si të tillë në rrjete sociale, media, etj.
Sakaq qytetarët herë pas here shtrojnë pyetjen: A do të hyjë PD në zgjedhje dhe a do të mbahen ato me 30 qershor të këtij viti ?