Është e disata herë që demokratët e Matit, të drejtuar nga kryetari i Bashkisë Nezir Rizvani dhe i dërguari i PD-së Kreshnik Çollaku kryesojnë protestat në qytetin e Burrelit. Ditë më parë ata sulmuan KZAZ nr.16 dhe shkatërruan materialet zgjedhore.
Shtabi elektoral i kandidatit të Partisë Socialiste ka reaguar sonte, pas tentativës të punonjësve të administratës së Bashkisë Mat për të risulmuar KZAZ e vendosur në palestrën e shkollës së mesme “Pjetër Budi”.
“Mati e ka vuajtur keq vitin 1997. Marrëzia e atij viti solli dhjetra viktima në Burrel, qindra të plagosur, rrënim të biznesit, pasiguri e kaos të madh. Asokohe Matin e drejtonte Partia Demokratike. Edhe tani, pas 22 vitesh, PD e drejton Matin. Është për të ardhur keq që skena të tilla po përsëriten në qytetin tonë. Kryetari i Bashkisë Nezir Rizvani dhe i deleguari Kreshnik Çollaku po tentojnë ta tranzojnë Burrelin dhe Matin. Do të jenë përgjegjës për çdo incident që ata mund të urdhërojnë. Rizvani e Çollaku, ndërsejnë individë me preçedentë penal dhe pasi arrestohen, dy drejtuesit e protestave të dhunshme i lënë në mëshirë të fatit, madje deklarojnë se “nuk janë njerëzit tanë”, pra i braktisin. Ne, komisionerët, vëzhguesit, antarët dhe simpatizantët e PS-së do të mbrojnë me korrektësi e ndershmëri votat e matjanëve. Po ashtu socialistët janë në krah të efektivave të Policisë së Shtetit”, thuhet në deklaratën e PS Mat.
Sipas drejtuesve të shtabit elektoral të kandidatit Agron Malaj socialistët nuk kanë provokuar askënd, nuk kanë organizuar antimitingje, nuk kanë dhunuar asnjë institucion. Më tej thuhet se: “Bashkiakët e Matit në ikje e sipër, pas dështimit të tentativës për shitjen e objekteve publike, po tentojnë t’i djegin, shkatërrojnë, dhunojnë. Historia do t’i ndëshkojë drejtuesit e këtyre protestave antiqytetare”.