SPAK një hap larg arrestimit të Berishës, ja çfarë ndodh të enjten. Grupi Basha: Ne do votojmë pro

Rregullorja e Kuvendit të Shqipërisë është shumë e qartë në hapat ligjorë që merr Parlamenti për kërkesën e SPAK-ut për arrestimin e Sali Berishës. Parlamenti do të votojë të enjten e 21 dhjetorit për të autorizuar SPAK-un të arrestojë Berishën. Për këtë i duhet të ketë një raport, që do të bëhet gati brenda të mërkurës, me dakordësinë e Partisë Socialiste dhe Partisë Demokratike zyrtare, të përfaqësuar nga Enkelejd Alibeaj. Ky raport i dorëzohet Parlamentit që cakton rendin e parë të ditës dhe merr vendim me votim të hapur. Një seancë që nuk pritet të jetë e qetë, për shkak të protestës së paralajmëruar nga opozita.

Parlamenti ka votuar pro heqjes së imunitetit të deputetëve, kur është kërkuar nga prokuroria për arrestim. Përjashtim bën rasti i ish-ministrit të Brendshëm Saimir Tahiri, për të cilin maxhoranca refuzoi kërkesën e Prokurorisë, duke lejuar vetëm disa masa shtrënguese më të lehta, si ato që ka aktualisht Berisha. Por të enjten nuk do të jetë ky rasti. Pas datës 21 dhjetor, SPAK-u do të ketë autorizimin për arrestin e Sali Berishës dhe i takon prokurorisë të kërkojë më pas arrest me burg ose arrest shtëpie.

Lexo edhe :

Partia Demokratike, ajo zyrtare e Lulzim Bashës ka mbështetur Këshillin e Mandateve që miratoi kërkesën e SPAK-ut për dhënien e arrestit ndaj Sali Berishës. Në një deklaratë të zëdhënëses Mirela Karabina, thuhet se PD-ja do të votojë heqjen e imunitetit të çdo personi që është kërkuar nga SPAK. Duhet thënë se nga 6 vota, 5 të PS-së, një votë pro arrestimit u dha nga Enkelejd Alibeaj, i PD-së së Bashës.

“PD ka kërkuar dhe votuar heqjen e imunitetit të çdo personi që është kërkuar nga SPAK dhe do ta bëjë këtë për çdo kërkesë që do të vijë nga SPAK. Jo vetëm kaq, po ne kemi dërguar në Parlament kërkesën që çdo deputet të heqë dorë me vullnet të lirë nga imuniteti. Askush nuk mund të ketë asnjë mburojë përballë drejtësisë, as siç po bën Sali Berisha sot, e as siç bëri Arben Ahmetaj që i iku drejtësisë”,-thuhet në deklaratë.

Teksa hedh akuza mbi kreun e dikurshëm, PD-ja e Bashës thotë se do të mbështesë pa asnjë hezitim drejtësinë dhe e inkurajon atë të sjellë sa më shpejt kërkesa për imunitetin e zyrtarëve të tjerë të korruptuar.

”Sali Berisha nuk mund të fshihet më pas mashtrimeve ordinere. Ka dy vjet që e mban peng e përçan dhe e sulmon PD, vetëm e vetëm se nuk arriti ta bëjë mburojë të halleve të veta. Sot është e qartë para çdo shqiptari se për çfarë e luftoi Sali Berisha, Partinë Demokratike; për hallet dhe interesat e tij personale. Lufta dhe halli i tij nuk janë dhe nuk do të jenë kurrë halli i PD. Mashtrimet e financuara me paratë e krimit të korrupsionit, nuk e ndihmojnë dot Sali Berishën. Ai duhet t’i zgjidhë vetë hallet e tij me drejtësinë, të lërë mashtrimet dhe të shkojë të sqarojë akuzat ndaj tij. Kush i ka shërbyer Edi Ramës është shpërblyer me kullën më të lartë në Ballkan, në mes të Tiranës, me tendera e leje për resorte në bregdet. PD do të mbështesë pa asnjë hezitim drejtësinë dhe e inkurajon atë të sjellë sa më shpejt kërkesa për imunitetin e zyrtarëve të tjerë të korruptuar, përfshirë dhe Edi Ramën. Një gjë është e sigurt: Aleanca e kullave nuk do ta mbajë dot peng PD-në”, përfundon deklarata.