Festivali Folklorik, “Oda Dibran” është një nga festat lokale më të rëndësishme të zonës së Dibrës e cila bën bashkë grupe artistike nga të gjitha trevat shqipfolëse. 29 vite më parë nisi udhëtimin ky festival mbarëkombëtar, për të shpalosur vlerat më të mira kulturore dhe artistike të trevave shqiptare.
“Për dy netë me radhë, në Dibër të Madhe dhe në Peshkopi, 11 ansamblet dhe grupet pjesëmarrëse nga Shqipëria, Kosova, Maqedonia e Veriut dhe Mali i Zi, sollën elementë unik të folklorit të krahinave nga ata vinin si këngë, valle, kostume të larmishme, rite e lojëra të ndryshme popullore”, shkruan kryebashkiaku i Dibrës Rahim Spahiu në rrjetet sociale.
Mbrëmja finale e “Odës Dibrane” e tejmbushi sallën e Pallatit të Kulturës “Haki Stërmilli” me spektatorë dibranë, të ftuar, artistë e miq, ku mes tyre nderoi me prezencën e tij kryetari i Komunës së Dibrës së Madhe z.Hekuran Duka. Momenti më emocionues ishte ndarja e çmimeve, ku juria profesioniste shpalli fitues të çmimit të parë, ansamblin “Lura” për prezantim fantastik e të kompletuar, ndërkohë edhe grupet e tjera artistike u vlerësuan për numrat e realizuar më bukur!
Krahas këtij festivali, në Peshkopi u mbajt edhe “Festa e të Vjelave”, event i cili bën bashkë fermerët e zonës të cilët promovuan prodhimet e stinës, produktet e artizaneve dhe gatimet tradicionale. Zv.ministrja e Turizmit dhe Mjedisit, Almira Xhembulla e pranishme në këto aktivitete thekson se: “Bashkë me sektorin privat dhe pushtetin lokal është e rëndësishme të bashkërendojmë forcat për t’ju përgjigjur dinamikave dhe kërkesave të sektorit”.
Ajo nënvizon se “Dibra e stolisur nga perlat e natyrës, e bekuar me njerëzit punëtor e guximtar dhe e pasur me histori e traditë të jashtëzakonshme ka akoma shumë potenciale për t’u zhvilluar e mbështetur”.